Da bini wieder. De Papi isch echli lahm mit de Blogiiträg. Jetzt han en wieder mal so wiit bracht. Er het aber verschproche, dass er die letschte Usflüg auna duet schriibe.
Ich han uf min Geburi en Rucksack übercho wo de Papi chan ahlegge um mich uf en Berg ufezträge. Das hani natürli welle usprobiere. Ich han mit für en Bärg i de nöchi entschide.
Drumm hemmer üs für de Wildspitz entschide. Us de Vorbereitige han ich mich natürli drusghalte. Han nur gseid was mer für mich mues mitneh.
De Hufe zum mitneh isch immer grösser worde, und de Papi immer bleicher.
Vilicht isch die Bleichi au vo de Sunnecreme cho. Irgendwie het die ned richtig iizoge und de Papi het wie en Schneemah usgseh.
Nachdem alles iipackt gsi isch simmer mit em Auto bis zum Parkplatz Langmösli gfahre.
De liit uf 1075 Meter über Meer.
De Papi het uf de Charte en Wäg gfunde woner na nie gloffe isch.
Drum umbedingt mal usprobiere. Ich glaub es isch scho chli schwär gsi, wo er mich denn s'erschti mal uf em Rugge gha hed :-)
Er het sich aber nüt ahmerke la und mer sind los richtig Heumoosegg. Nach de Heumoosegg isches denn uf em Grat wiiter druf gange. Ich han en riise Schpass gha hinde druffe. Chli mit em Mami blöderlet und die schöne Bäum ahglueeget.
Denn isches losgange. Immer schteiler isches duruf. Am Mami isch de Schpass vergange. Risigi Schtei hend mer müesse erklimme. Für de Papi mit de lange Bei natürli kei Problem. Denn het mer sich ame Seili müesse über en Felse ufezie. Wow, aso mier hets schpass gmacht.
Denn simmer entlich uf em Gnipe ahcho. Zyt zum es Päuseli zmache. Läck han ich fengs hunger gha. Bim packe hani gse, dass de Papi alles für es Füürli iipackt hed. Oh es Füürli hani dänkt.Doch nach 5min isch de Papi wieder us em Wäldli cho und het gmeint, dass er kei Holz chan finde. Aso Holz scho, aber das ich alles no ahgwachse :-) Janu, denn issed mer d'Cervalat halt chalt.
Denn schnäll na uf e Gipfel. Ja aber, da gaht ja scho wieder abe....
Ich bin denn iigschlafe, woni gseh han, dass es wieder abe gaht, obwohl mer nanig dobe gsi sind. Ich bin denn wieder verwached und mer sind im Reschti zoberscht gsi.
Läck die schön Ussicht. Und es het mega vill fuuli Lüt gah.Die sind all mit em Velo ufegfahre. So denn simmer wieder abegloffe. S'Mami het nümme det dure welle wo mer ufe cho sind. Janu, denn hemmer halt en andere Wäg gno. Womer im Alpli ahcho sind, hemmer na dur en grossi Chueherde dure müsse. S'Mami
het nümme so glücklich usgseh. Ich han kei Angscht gha, ich bin ja wiit obe gsi :-) Im Alpli han ich denn alli unterhalte. Mer sind denn gli wiiter richtig Heumoosegg und denn zum Auto. De Papi het echli roti Schultere gha. Mer weiss ned, obs vo mim Gwicht, oder vo de Sunne gsi isch :-)
So endlich wieder en Iitrag. Mal luege öps na meh git.Grüessli Shannon
Posts
