Shannon's erschti Ferie Tag 3

Sali mitenand

So da bini wieder. De Papi het huere alt us gseh. Chönnt das ächt vom Freibier cho, oder vo mier?? Er het zwar gseid, es seg ned so guet gsi, aber ebe... Sis usgseh!? Da ich eh scho wach gsi bin, bini grad mit em Papi go dusche. Denn hemmer üs ufs z'Morgebuffed gschtürzt. Uf die viertel ab 11i hemmer üs im Babyschwimme iitreid. So simmer zerscht gos Schwimmbad sueche. D'Familie Graf isch mit Bademantel bewaffnet in Lift iigschtige. Ab is 1.UG. Det het de Papi doch tatsächlich mit üs id Chuchi welle. Das Freibier isch ned gsund ;-) Mer hends denn doch na gfunde. Und mer sind die Einzige gsi. Es nets Fräulein het denn mir zeigt, was mer so im Wasser chan mache. Em Mami hets ned eso gfalle, Ihre isch s'Wasser bis zum Hals gschtande :-) Ich han vill Sache glernt, wo mer üsi Schwimmlehrerin in Zug na nie verzellt hed. Zum Bischbil hani glernt, dass mer tuet tauche, wemmer vom Rand ineschpringt :-) Mit em Papi hani denn na güebt, mit de Füess uf sinere Hand balanciere. Ah und ich bin sogar ganz alei mit 2 Schwimmflügeli uf em Rugge und uf em Buuch gschwumme!!! (O.k uf em Buch hani scho chli Wasser gschluckt. Das hani aber au grad wieder bislet ;-)) Dänn simmer wieder ah mis Breibüffet. Denn go schlafe und wieder go Znachtässe. Hüt bini so guet ufgleit gsi, dass s'Mami und de Papi sogar s'Dessert hend chöne im Spiissaall ässe :-) Denn ab go pfuuse. (En huere Lärm isch die Nacht gsi. Irgend en Prob für irgend en sch... uf de Schiipischte.)

Grüessli Shannon

Shannon's erschti Ferie Tag 2

Hoi zäme

Wie ich am Morge erfahre han, han ich gar ned guet gschlafe. Debii bini doch ned eso mängisch verwached ;-) S'Mami und de Papi hed aber rächt müed driiglueget. Uf jede Fall simmer uf und go zmorge ässe. Es hed es tolls Büffet gha. Mer sind wieder näb em Diego ghocked wie geschter Abig. Nach em Zmorge simmer ufs Zimmer. De Papi het glueget, wie mer i dem Hotelzimmer zu eme Internetahschluss chund. Er hed schnäll gmerkt, dass das öppis zuesätzlichs choschtet. Aber wemmer wett en Blog schriibe und echli Mails läse, denn mues mer halt defür bläche. Denn hemmer mal welle veruse goh. Bi de Reception, wo mer en Fällsack für de Schlitte oder de Chinderwage überchunt, hemmer wieder de Diego, sis Mami d'Nicole und de Papi de Andy troffe. Mer sind denn zäme go schpatziere. Vom Hotel isches durab ad Hauptschtrass gange. Dete unde dure und richtig Kirchdorf. Läck isch das en schiis Wäg gsi. Üs hets fascht us em Wage grüert. Uf dem Wäg hets eso feschtgfrornige Schnee gha, dass die billige Chinderwäge fascht ned dure cho sind. Zum Glück simmer beidi iigschlafe. Es het denn na en Zwüschehalt geh, well em Diego sim Wage es Rad abghheit isch. Mer sind dank dem „guete“ Wäg ned emal bis nach Kirchdorf cho, womer scho wieder hend müesse umchere. Am Umkehrpunkt simmer beid verwached. Mer sind froh gsi, dass mer uf de Langlaufloipe zrugg sind. Wieder im Hotel hets z'Mittag geh. Am Namitag simmer namal go spatziere. Mer hend en neue Wäg usprobiert. Churz vo de Vieri gaht da d'Sunne under. Läck, dass wird grad mega chalt. Zum Glück han ich immer en Fällsack. Am vieri simmer in es anders Hotel. Ich bruche um die Zyt ja mini Zwüschemalhzit. Mer sind im Hotel Furtherwirt gsi. Ich han nid nur Milch welle, sondern au echli Kafi. Drumm han ich mier am Papi sis Tassli gschnapped. Die Aktion isch ned so guet ahcho. Ich weiss ned werum? De Papi hed denn namal es Kafi bschtellt?! Vo dem Hotel bis hei, isch es denn schnäll gange. Wieder uf de Loipe, sind d'Eltere em Loipoefahrzüg devo gloffe. Es währ ned toll gsi, hette de üs iigholt :-) Tja, wieder im Hotel, und wieder hets Ässe geh. Aso für die Erwachsene. Denn is Bett.
So fies, de Papi hed na Männerabig, mit Freibier und TV gha.
Grüessli Shannon

Shannon's erschti Ferie Tag 1

Hoi zäme

Mier sind hüt sehr früeh ufgschtande, und hend au früeh welle abfahre.
Doch wie das mit de Erwachsne so isch, es duured immer so lang :-)
Wo es denn endlich losgange isch, het de Papi na müesse all sinni Elektrodinger im Auto installiere. Mer sind denn losgfahre. Über de Hirzel richtig Chur. Ich han gli gmerkt, dass das de glich Wäg isch wie mer vorgeschter scho uf Valbella gfahre sind. Drum han ich denn na e chli pfuused.
Bi de Autobahnverzwiigig Sargans hemmer en neui Schtrecki gno richtig Liechteschtei. Darum bini au wieder verwached. (Han ja nüt welle verpasse.) Langsam hani Hunger becho. Das isch aber eso iigrächned worde, drum hemmer denn in Feldkirch es Päuselii iigleid. Übrigens: Jetzt hani extra en ID la mache, und a de Gränze hed sie niemerd welle ahluege. Bin schon chli enttüscht :-)

In Feldkirch simmer usgschtige. Läck isch das chalt gsi. Drum simmer schnäll in es Reschti. Det hets denn es Breili für mich geh. Die Alte hend sich en Crepe gno. (Es hed nur Crepes geh) Sie hend sich amüsiert, wie de Kellner und de Choch gschtritte hend. De Choch währ fascht defo gloffe. Denn hetis doch ekei Crepes geh ;-). Wie immer hani denn nach em Ässe mini Windle gfüllt. Aber i dem Reschti hets e so es chlises WC gha, dass es dete ned gange isch mit windlewächsle.

Drum simmer na rasch in MC-Donalds. Zerscht is s'Mami go sondiere und es het wieder kei Wickeltisch gha. Also hends mer eifach zmits im MC-Doof d'Hose abegla und de Pneu gwächsled. Läck han ich mich gschämt ;-)

Denn wieder is chalte Auto und wiiter ische gange. Richtig Innsbruck.

Denn hets vili Tunnels gha richtig Arlbergpass. Das isch mer denn echli zu blöd worde und echli Hunger hani au no gha. Drumm hets na en Zwüschemalhzit währed em fahre geh. De rescht vo mim Breili. Das hani denn au schön uf mim Sitz verteilt.

Richtig Innsbruck hend im Radio immer vo Schtau gredt. Am Papi sis Navi hed aber nüt ahzeigt. Zum glück hets Navi rächt gha. Mer sind denn ah Innsbruck verbiibrättered (mit 100 kmh) Denn na rasch uf en Raschtstett ufs WC. Ich han au dörfe usschtige und im Lädeli alli go ahlächle.

Wiiter und gli ab de Autobahn. Oh und doch na en Schtau. All hed vo de Schiigebiet hei welle. Denn isches wieder besser worde, doch churz vor em Ziel, isch in St. Johann gar nüt meh gange. Anschienend en Umfall. Doch denn simmer churz vor de 5i ahcho.

Am 5i het grad en Huusfüehrig geh. Denn hani au grad de Diego (10 Mönet) und de Leonard (1 ½ Jahr) känne glernt. Denn hets au scho am 6i Znacht geh.

Wo ich denn min Schoppe han welle bini mit em Mami und em Papi ufs Zimmer gange. Da die naning ferti gsi sind, hend s'Dessert uf em Zimmer übercho.

Ich bin denn iigschlafe.

Grüessli Shannon