Besichtigung vom neue Kantonsschpital

Es isch wieder einisch Sunntig und Usflugtag.
De Papi isch au endlich wieder vo de Prüefige us Basel retour.
Ja ich bin ja echli zfrüe da gsi, um im neuen Schpital in Baar uf t'Wält zcho,
drumm hemmer hüt welle go luege wies usgseht hetti.
Mer sind mit em Chinderwage gschtartet. Alles de alte Lorze nache.
Unterwägs het de Papi gmärkt, dass mer au hinter em Twerebold
direk zum Schpital chan laufe!
Im übrige han ich gmein, es heissi Zentralspital!? Aber jetzt isch doch
alles mit Kantonsspital ahgschribe.
Womer ahcho sind, hemmer feschtgschtellt, dass mer ned die einzige
mit dere Idee gsi sind. (Mer hed dänkt, es seget scho all geschter gsi.)
Also ahschtah. Natürlich isch de Papi wieder a dere Schlange higschtande
wos vill länger gange isch.
Zum Glück het mich de Papi treit, süsch hetti auna die doofe Plastilüberschue
müesse ahzieh.
Na und denn hemmer das "Supergraue" neue Schpital ahglueget.
90min hets duured. :-(
Denn womer dusse gsi sind hani gnueg gha.
Drumm hends mi schnäll wieder heigrolled.
Grüessli Shannon

De Papi in Basel go hole

Sali, da bini wieder!
Natürli hemmer üs vorgnoh, de Papi wieder in Basel go hole.
Aso eigentlich isches an Mami sini Idee gsi, doch ich bin denn
au mitgange:-)
Isch au guet gange, bis mer in Basel in Schtau cho sind. So hed de Papi nachli
törfe warte.
Denn echli a de früsche Luft en rundi s'Füdli schwänke, während de Papi
sin Bärg an Schuelbüecher is Auto gwürged hed.
Er hed na es paar Föteli vo de Prüefig gha:

(2-3 Persone sind mit em Papi a de Prüefige gsi ;-) )

Denn simmer losgfahre. Aber nei, doch ned grad direkt hei, sondern na id IKEA uf Pratelen.
Nach eme fascht endlose laufe dur d'IKEA hets na es paar Mini-Hotdogs geh.
Ich han natürli wieder nüt becho.
Das hani nach em Abfahre au sofort luut reklamiert. Das het natürlich wiedermal funktioniert,
und mer sind grad uf die nächscht Raschtstett.
Zerscht han ich en Rundi warmi Milch becho, und denn sind disi 2 na es Menü go näh.
Ja und so simmer denn am schpötere Abig wieder Dihei ahcho.
Grüessli Shannon

De Papi uf Basel bringe

Da bin wieder.
De Papi isch in letschter Zyt echli nervös!? Ich glaub er hed nochli nachholbedarf
mit lerne. Uf jede Fall gahts hüt uf Basel a die schriftliche Prüeffige.
Mich hets Autofahre wieder mal ahgschisse, drum han ich au scho
nach Rotchrüz ahfo lärme. Es het gli Wiirkig zeigt. Uf de nächschte Raschtschtett isch denn s'Mami zu mier hindere cho :-)
Jetzt wos Mami näbed mier gsi isch, hani guet chönne schlafe.
Woni verwached bin, simmer scho in Basel inere Tüfgarasch gsi.
De Papi hed wüescht gred, well er zerscht fasch ned zum Auto use cho isch,
da es echli ängi Parkplätz gsi sind, und denn hed er min Chinderwage
na müesse dur d'Ifahrt ufeschiebe, da es kei Lift gha hed :-)

Mer sind denn go Znachtässe i es Reschti.
Aso ich han zueglueget und den nach de Hälfti ahfo min Sänf dezuegeh.
Denn simmer uf es Bänkli vor em Circus Monti ghocked und ich han au
no Znacht übercho.
Langsam isch Zyt für d'Verabschidig cho. Mer sind is Hotel vom Papi
zrugg und wieder is Auto.
Ha, de Papi hed scho wieder wüescht gred.
Mich hends uf de Biifahrersitz montiert und nächhär heder gmerkt,
dass er au uf de Biifahrersiite müesst iischtige :-)
Er isch denn hinde ine und über all Sitz füregschtige.
Ich han denn luut päget bim losfahre, bin denn aber grad iigschlafe
und erscht wieder Dihei verwached.
Grüessli Shannon

Usflug uf zur St, Jost

Es isch wieder einisch Sunntig und ich glaub es git wieder en Usflug. So wie ich das mitbecho han, het de Papi bim schriibe vom letschte Blog iitrag en Charte mit Wäge vom Rate gfunde. Es git dezu au no en Homepage.

Denn simmer mal uf en Rate ufegfare. Das mal extra :-)
Dobe ahcho hemmer gseh, dass na Autokino isch.

Mer sind denn los de Hoger ufe. Es isch immer schteiler worde und ich
bin duregschüttlet worde. Hmm das hani mega gärn.

Nach 20min simmer scho im St. Jost ahcho.
Es Mineräleli und es Möschtli für die Alte und für mich en lauwarmi Milch ;-)

Da mer ned scho wieder retour hend welle, het de Papi gmeint, mer laufed na bis zum Ussichtspunkt wommer uf Rothenthurm abe gseht. Dete tüemer luege wie de Wäg wiiter usgseht.
Ja aso am Ahfang het de Wäg wiiter ja super usgseh. Schön gschnitzlet. Doch nach öppe 50 Meter sind denn die erschte Wurzle cho.
Ich bin glaubs mängisch überem Chinderwage gfloge :-)
Nach namal 100 Meter hani müesse zum Mami umschtige und de Papi het mit em Chinderwage eleige kämpft.
Zu de Wurzle isch denn auna de Schlamm dezue cho. D'Eltere hend öppis vo
frisch gwäschnem Auto und Schueabputze gred, bin aber ned drus cho!?
Ich han denn auch wieder i mis Wägeli törfe und ich han au scho gli de Waldrand gseh.
De Papi isch so fuul gsi, dass er grad namal en Abchürzig über d'Wiese gno hed.

Denn isches alles wieder duruf gange ufeme Waldsträssli. Ich bin denn au iigschlafe.

Bim Rate obe bini wieder verwached, well irgend eine en Helikopterrundflug bueched hed,
und grad gschtartet isch.
Ja den isch das mit de dräckige Schue und Wageredli wieder cho, und trotzdem sind beid is Auto iigschtige und ned heigloffe??

Grüessli Shannon

Usflug uf e Gottschalkebärg

Hallo zäme!
Ich han hüt dörfe en Usflug unternäh. So vill ich mitbecho han, hemmer mit em Auto uf e Zugerberg welle und dete in Hindergeissbode welle Laufe. De Papi het sich wieder einisch grauehaft ufgregt , weller het müesse hinder eme Lahme härfahre, dass er im Moosrank gradus gfahre isch anschtatt richtig Allewinde. Janu, denn gömmer halt uf e Rate. Isch au en Möglichkeit anschtatt umzchere :-) .

Dobe ahcho, simmer richtig Gottschalkebärg gloffe. Es het es ahgnähm Lüftli gha. Leider hend mini Eltere immer de Sunneschirm und auna Sunnesägel am mim Wage ufgschpannt gha.
Grad am ahfang hemmer en Walkerin überholt. Die het na meh gschnufet als de Papi. Uf halbem Wäg hemmer na gekonnt en Chinderwage mit Zwilling links la ligge.

Dobe ahcho hend mini beide Motore zerscht müesse Tanke. Au ich han echli Tee übercho.
Denn hends nümme welle ufschtah und hend na es Glace abegschtellt.







Endlich isches wiiter gange. Zume Ussichtspunkt. Super gsi für mich. Gseh doch nanig eso wiit!!
Es het dete na Fraue gha die hend det hinde abe glueget und de Zugersee gseh. De Papi und s'Mami hend sich en Schranz glached und hend wieder umkehrt.









Denn alles wieder retour zum Parkplatz Rate. Das hed auna duured.
Han die beide Schieber echli ahtribe in dem ich echli ahfah schreie han.







Die hend nächhär ned emal me traut heizfahre und hemmer scho uf em Parkplatz mini Milchbar parat gmacht.
So denn ab Hei und is Bett.

Grüessli Shannon