Zugerberg mit Bähnli :-)

Hoi zäme!
Hüt isch Samschtig, und das bedütet: Ich gange go schwimme :-)
Das Babyschwimme isch super. Usser das mit de Umkleidekabine het mer scho chli besser chönne löse. Nur mis Problem isch das ja ned, denn ich tuen gärn umeblüttli. Mini Eltere wennd das zwar ned, well ich denn au gärn tuen bisle :-)
Denn hemmer welle go Föteli mit mier mache, aber üsere Fotografin isch leider öppis dezwüsche cho. Ja was möched mer mit some ahbrochne Samschtig?? Mer gönd uf ed Zugiberg. Da mer scho fascht dobe sind (Stiftig Maihof) wemmer natürli s'Bähnli näh.
Wie chönnts au andersch si, simmer echli spaht dranne gsi. Wie isch scho ime frühnere Itrag gschribe han fahrt das Bähnli immer 26 und 56. Aso bi 20ab isch de Papi fengs im Parkplatz ahcho. Leider isch de volle gsi. Es sind wieder komischi Wort vom mim Chauffeur (öh oder wie mer de schriibt) cho. Schnäll wieder abe und in Wald hindere zum nächschte Parkplatz. Uf dem Wäg zum Wald hets ganz fiisi Schwelle iibaut. Ich bin mit mim Chindersitz fascht a de Dechi ahscho :-)
Det hets sogar na es Plätzli gha.
Hau ruck, de Wage us em Kofferum und dasmal mit mim Auto über die Schwelle.
Mer sind denn au na uf das Bähnli cho. Aber es isch nümme Punktlich gsi. ups....
Bim i und usschtige hend mini Eltere gmärkt wie unpraktisch doch Schtäge sind mit eme Chinderwage. Aber Chinderwäge i de Zugerbergbahn isch sicher en usnahm oder!?
(Es isch ja uf de Homepage au immer obe es Bildli womer gseht wies isch..)
Dobe ahcho het de Papi na müesse en Schwatz it em Werni duregeh, bevor mer hend chönne schtarte.
Denn vollgas hindere in Hindergeissbode. Churz vor em Ziel hani nümme möge und müsse en Schpruz Milch in Schacht abe schtelle.
Denn simmer uf Terrasse ghocked go sünnele









Es isch cheibe amüsant gsi im Reschti. Da beid vergässe hend uf Bank gah, hends immer schön zämezellt und denn namal öppis bschtellt. Das eso lang bis nüt meh ume gsi isch.
Denn simmer wieder retou gloffe. Bi de Station acho isch natürli genau 36 gsi. 20min warte?? Nui.
Denn gömmer hald z'Fuess de Berg durab. (Aso ich glaub das gaht scho under Bärg oder? Diego?)
Mier isch denn scho gli echli vill Bluet in Chopf gschtige. Aber min Wage hets in sich. Suber rasch d'Ruggelähne chli ufegschtellt! De Papi het denn auch immer echli fescht hinde druf drückt.
Mer sind so schnäll gsi, dass d'Chüe nümmer drus cho sind.
Zägg und scho simmer dune gsi.
Wieder bim Auto hemmer denn na gseh, dass es tatsächlich en Frau gsi isch, wo ires Auto Quer zu allne andere anegschtellt hed :-) (Ich wirde das sicher nie mache)
Grüessli Shannon

Zugerberg

Tschou zäme

Da bini wieder! Hüt isch Sunntig und ich han scho fascht gwüsst, dass mer wieder neumed higönd. Mer hend de Götti gfraged, öb er und d'Sandra wend mitcho.
Ich han glaub wieder mal zum falsche Zytpunkt Hunger gha. Uf jede Fall isch dem Papi wieder wie en verruckte richtig Zugerbergbahn gfahre. Doch uf de Chamerschtrass isch scho fertig gsi. E so en Schnarchnase isch vor üs hergfare. Am 26ab fahrt ämigs s'Zugerbergbähnli. Am 23ab het den de Papi em Thomas ahglütte das mer es nümme schaffed. Da am Sunntig nur immer um 26 und 56 es Bähnli fahrt, hed s'Mami und de Papi beschlosse, dass mer ufefahred. So hets na es paar Kürveli geh, a de alte Sternwarte verbi, a de St. Verena Kapelle und es paar Restaurants. (P.S. weiss öppert, was mit dere Sternwarte isch?)
Dobe ahcho simmer losgloffe in Richtig Hindergeissbode. Det simmer aber wiiter zu de Fiselstudehütte. Den isch de Papi und und Götti übermüetig worde und sind mit mier go Crosse in Wald. Es isch denn sowiit cho, dass ich han müesse usschtige und die zwee Herre hend de Chinderwage treit :-)

Wommer zum Wald usecho sind, simmer au scho gli am Buschechapeli verbii cho. Dete isch na en Ahlass gsi und mer hend de Papi vo de Sandra troffe. Vo dete us hemmer au scho üses Ziel gseh. S'Reschtaurant Pfaffebode.

Mer hend no fascht müesse pressiere, da de Pfaffebode usnahmswiis scho am 5i zumache hend welle. Ich han ja wieder einisch nüt dörfe am Tisch ässe. Die alte hend zum Teil Kaffi und Dessert zu sich gno und die andere hend Pommes und Wurscht gässe.

Ich bin denn mit em Mami na rasch uf es Bänkli näb em Reschti go ässe. Aso ich han vor luuter umeluege gar nüd welle ässe)

Wommer retour gloffe sind hets ahfah tröpfele. Aber zum Glück simmer schnäller als de Räge gsi. Bim Früebüel rächts abbiege und alles a de Krete na retour zur Zugerbergstation. Unterwägs hani na ufs WC welle. Aber für was hani denn Windle ah? Mer hents Fotografiert und sind wiiter.

Tja mer hend üs verabschiedet und s'Mami het gmerkt, dass ich Ihre d'Halschetti abzehrt han. D'Sandra und de Götti hend aber mis Mami so guet ahglueget, dass sie gmertkt hend, dass die Chetti sit em Pfaffebode nümme deteghanget isch. Also ab is Auto, abe uf Zug, übere uf Walchwil und wieder de Berg duruf zum Pfaffebode. Und tatsächlich het de Papi d'Chetti näb em Bänkli i de Wiese gfunde. Wieder is Auto, abe uf Walchwil und via Zug direkt hei.

Tja das währs wieder mal gsi, mit Tricks und Gägs

Tschou zäme

Shannon