Schtillschtand

Wies usgseht isch da scho lang nüt meh gange :-(
De Blogg wird mit em Jannic erwiitered und denn aktualisiert.
Gruess Marco

Ferien Tag 6

Hallöle zäme

Hüt hemmer üs vorgnoh, uf de Berg Rofan go wandere . Leider isch es am morge Näblig gsi. Also simmer zerscht go .... Pony riite. Denn hemmer verusse gschpillt und uf bessers Wätter gwartet. Nach dem mer gmerkt hend, dass une zwar z'Sunne gschine hed, aber obe immer no Näbel gsi isch, hemmer üs entschide, dass mer ufs Schiff gönd.  Mer hend gmerkt, dass es noch schwierig isch en Schiffschtäg gfinde, wemmer ned weiss i weli Richtig am Ufer entlang. Die zwei wo hinde de Chinderwage gschobe hend, sind natürli i die falsch Richtig. Also hets na en chline Spurt geh. Uf em Schiff hemmer es guets Plätzli hinde verusse gfunde. A de nächschte Halteschtell isch denn aber es komplets Alters- und Pflegeheim iigschtige. Das het ewigs duured. Janu, es isch niemerd hindeuse cho. Wommer zoberscht am See ahcho sind, isch aber namal es Altersheim uf Usflug iigschtige. Die sind denn auch hinde ufs Deck usegrollt. Es isch so mit Rollstüel überstellt gsi, das mer ned emal meh ufs WC oder is Cafe ht chönne. Mer hend denn au scho en Station vor üsem usschtige ahgfange üs mit em Chinderwage us dere Sackgass usezmanöfriere. Nach enere logistische Meischterleischti simmer denn au churz vor de Halteschtell bim Usgang gsi. Denn simmer zrugg go Jause neh und na chli go schpile verusse.

Nach em Znacht simmer denn au gli ist Bett. Vilicht klappt es morn na mit em Berg.

Grüessli Marco

Ferien Tag 5

Hoi zäme


Am 5te Tag hemmer nach em ufschtah gseh, dass es rägnet. Trotzdem simmer nach em Zmorge go Pony riite und denn noch go Gokart fahre. Ich han natürli wieder gwunne. Denn simmer in Chinderklub go baschtle und male. Ich bin als Pirat gschminkt worde. Mit em Fernrohr und de Fahne hemmer denn de Schatz gsuecht. Am Abig hemmer nach em Znachtässe no es Chindercasino gha. Natürli mit Unterstützig vo de Eltere. De Papi und s'Mami hend leider de ganz iisatz verspielt. Es het aber glich na en Priis geh. 
Denn hets wieder gheisse ab si Bett.
Grüessli Shannon

Ferien Tag 4

Servus us Öschterich

Hüt simmer nach em zmörgele wieder go Pony riite. Während de Jannic mit em Mami isch go de Montesori-Chindsgi bsueche, bin ich mit em Papi go bädele. Das mal simmer direkt in Pool. De Teich isch immer naing wärmer. Mer wüssed jetzt au werum. Das Wasser von Teich wird us em See ufepumped und dä isch ned würklich warm

Nach em mittag hemmer 2 Elektrovelos gmieted. De Papi het en Flyer mit em Chinderahhänger gah, und s'Mami het en Bike-Flyer übercho. De Papi het kei Chance gah gäge s'Mami.

Sie het glaubs grad uf de gröscht Berg chönne fahre. Mer sind am Achensee entlang bis uf Achenkirchen gfahre. Womer zu eme Chileli ufegfahre sind, hemmer gmerkt was de Elektroahtrieb bewirkt. De Papi isch de steil Chiiswäg im sitze ufegfahre, und s'Hinterrad hed gschpueled. Denn simmer am See entlang wieder retour bis uf Maurach. Det het de Papi scho en neue Akku brucht. (Aso de Akku vom Velo isch läär gsi).

Denn simmer wieder retour uf Buchau go Znacht ässe. Nach em Znacht isch d'Chinderdisco loosgange. Ich bin mit de Romina und em Andrin go abtanze. De Jannic isch scho während em Ässe müed worde und vom Papi ist Bett bracht worde.

Nach em tanze hemmer no en Chinderbowle a de Bar gno und sind denn ist Bett.

Ich bin gschpannt, was mer morn möched....

Grüessli Shannon

Ferien Tag 3

Grüezi mittenand

Hüt simmer wie jede morge ufgschtande und go zmörgele.

Denn simmer direkt wieder go Pony Riite. Isch super gsi. Nächher hemmer de Jannic in Babyclub bracht. Ich han den törfe es Princessinebad go neh, während de Papi sich mit heisse Schtei het massiere lah. Wo mer alli fertig si sind, simmer go zmittag ässe. Denn simmer it em Chinderwage und eme "Bollerwage" uf Maurach gloffe. Mich hets voll verschriche währed em fahre. Woni wieder verwaches bin, isch min Wage voll mit Ihkauftem gsi, und mer sin ime Kafi ghocked. Währed em zurugglauffe hemmer na die toll Dampfbahn vom Achensee gse. Ich hand lässig gfunde, aber de Jannic het sich glaubs gfühlt wie dazumahls d'Indianer. Er hets ned eso cool gfunde. Wo mer im Hotel zrugg gsi sind, hemmer na Handabdrück gmacht. De Jannic und ich hend mega de Plausch gah. Und scho hets wieder Znachtässe gäh. Nach em Ässe mit em Desser simmer au scho wieder go pfuse.

Grüessli bis morn.

Shannon und Family

Ferien 2.Tag

Hallöle

Hüt simmer nach em Zmorge go Pony riite. Ich han törfe mit em Pepe es paar Runde dräie.

Sogar de Jannic isch uf eme Pony gritte. Denn simmer wieder is Hüsli und grad wieder use in Schwimmteil go bädele. Wobii bädele liecht übertribe isch. Es isch sau chalt gsi. De Papi het mich mit em Floos hin und här gruederet und ich han mini Füessli badet. Zum ufwärme simmer denn na in Pool ghüpft. Nächher hets om Mami na en Pedikür geh. Denn bini mit em Jannic in Chinderklup. Mer (s'Mami) hend en tolli Uhr baschtlet. Womer fertig gsi sind, hets no Glasse geh, bevor mer sind go Gocart fahre. Ich han de Papi und s'Mami natürli abghängt und gwunne. 

Nachdem mer na de Barfuesswäg absolviert hend, hets scho gli z'Nachtässe geh. 

Bi dem schöne Wätter isch de Tag schnäll verbii gange und scho hemmer wieder is  Bett müesse.

Grüessli Shannon und CO.

Ferien am Achensee

Hoi zäme

Nach langer Absänz schriib ich wieder mal. Mier sind i de Ferie in Maurach am Achensee, genauer gseit in Buchau. Det simmer im Rieser's Kinderhotel.

Hüt simmer ahgreist. Die 4 Stund fahrzyt sind rächt schnäll verbiigange, vor allem well ich han chönne DVD luege. De Jannic het de gröscht Teil gschlafe, oder er het au mit mier glueget.

Bevor mer an Achensee gfahre sind, simmer no um Innsbruck go lädele. Mer hend en riise Umwägd gmache, bevor mer gfunde hend was mer gsuecht hend. Jänu.

Womer ahcho sind, hemmer gschtuned, wo üs die netti Dame hiigfüert hed. Dur alli Gäng hindere bim letschte Huuse use und wieder ines Huus ine. Das isch jetzt üses Landhuus. 

Nach em iirichte simmer fein go ässe. Denn no echli go schpaziere und ab is Bett.

Grüessli Shannon und Jannic mit de 2 alte.